நண்பர்களின் சுவையான அனுபவங்களூடே முதல் கட்ட நிகழ்வு விவாதிக்கப்பட்டு இரண்டாம் கட்ட நிகழ்வான சிலப்பதிகார திறனாய்வு -
சிலம்பு மடலில் இருந்து சில அத்தியாயங்கள், ஜீன்ஸ் போட்டு வந்த நவீன இளங்கோவடிகள் திரு நாக இளங்கோவன் அவர்களால்
வாசிக்கப்பட தொடங்கியது.

நாக.இளங்கோவன் அவர்களையும்,அவர் எழுதிய சிலம்பு மடல் பற்றியும் போன கூட்டம் பற்றிய பார்வையிலேயே பல முறை
சிலாகித்து விட்டாலும் அவருடைய வரவும் - பகிர்வும் நம் எழுத்துக் கூடத்துக்கு கிடைத்த அரிய பொக்கிஷமாகவே
நான் கருதுகிறேன்.( பெரும்பாலான நண்பர்களின் கருத்தும் அதேதான் என்றும் பின் உணர்ந்தேன் ) இரண்டாம்
நூற்றாண்டு இலக்கியத்தை இன்னமும் சாகவிடாமல் புதுப்புது சொல்லோவியம் கொண்டு அழகு படுத்தியும்,
கொல்லாத ஒரு இலக்கிய நடையில் நல்லதான தமிழ் வார்த்தைகளை கொண்டு நகாசு வேலைகள் செய்து சிலப்பதிகாரத்தை செதுக்கி
வைத்து நூதனப் படுத்தியிருப்பதும் நம் எழுத்துக்கூடம் - ரியாத் தமிழ் சங்கம் மட்டும் அல்ல உலகத்தில் தமிழுக்காக உருவான அனைத்து தமிழ் சங்கங்களுக்குமே அடையாளம் காட்டப்பட வேண்டிய ஒரு தமிழ் இலக்கியவாதி திருவாளர் நம் நாக. இளங்கோவன் என்பதில் எள்முனையளவும் இரண்டாவது கருத்துக்கு இடமில்லை.

இந்த இந்த விஷயங்கள் இப்படி இப்படி நடந்திருக்க பகுத்தறிவில் - மெய்ஞானத்தில் அறிவியல் ஒத்துக் கொள்ளும் விதத்தில் விளக்கம் தந்து அசத்தினார் நாக.இளங்கோவன். பாண்டிய மன்னன் ஒருவன் செய்த தவறுக்கு கண்ணகி ஊரையே கொளுத்தியதில் என்ன
நியாயம் இருக்க முடியும் என்ற என்(னைப் போன்றோர்) நீண்ட கால சந்தேகங்களுக்கும் அன்று முடிவுக்கு கொண்டு வந்தார்
நண்பர்.  இரண்டொரு நாளில் தாயகம் திரும்பவிருக்கும் நண்பர் நாக.இளங்கோ மீண்டும் ரியாத் வந்து இது போல் பல ஆக்கப் பூர்வமான
இலக்கியங்கள் பற்றி உணர்ந்து- அறிந்து - கலந்து -பகிர்தல் செய்ய வேண்டும் என அன்போடு கேட்டுக் கொள்கிறேன்.. உங்களது தமிழ்
தொடர்பான அனைத்து முயற்சிகளும் வெற்றியடைய அளவற்ற அருளாளன் -தனிப்பெருங் கருணையாளன் எல்லாம் வல்ல இறைவனை
வேண்டிக் கொள்கிறேன்.

நாக இளங்கோவன் அவர்களுக்கு ஈடு கொடுத்து தனக்கு பூமியின் பௌதீகம் மட்டுமல்ல பூம்புகார் பதிகமும் தெரியும் என 'வூடு'
கட்டி அடித்தார்கள் ஐயா மாசிலாமணி அவர்கள். ( லேசர் பிஸிக்ஸ் பற்றியும் பேசுகிறார் சேரன் செங்குட்டுவன் பற்றியும் பேசுகிறார் ,
சிற்றிலக்கியம் பற்றியும் பேசுகிறார் புற்றிலக்கியம் (Cancer Theory) பற்றியும் பேசுகிறார்..உலகம் , வேதம், கம்ப்யூட்டர்,ஷெர்லாக் ஹோம்ஸ், சுனாமி , த்ரிஷா எல்லாவற்றை பற்றியும் பேசுகிறார் கொஞ்சம் எச்சரிக்கையாகவே பேசவேண்டும் போல் இருக்கிறது ). பக்கத்தில்
திருமதியார் இருந்தபோதும் ' பயமின்றி ' சில ரகசியங்களை போட்டு உடைத்த ஐயா மாசிலாமணி அவர்களும் , அப்பாஸ் ஷாஜஹானும்
உண்மையிலேயே மிகுந்த தைரியசாலிகள் தான். (அதுக்கப்புறம் வீட்டுக்கு போய் ஏதாவது 'தொடரும் பயங்கரம்' ஆகவில்லை தானே..
நலம்தானே )

சகல சௌகரியமாய் இந்த கூட்டம் நடக்க தம் இல்லம் தந்து குளிர்பானமும் தந்து உபசரித்த ஐயா வெற்றிவேல் அவர்களுக்கும்
எழுத்துக்கூடம் சார்பாக நன்றிகளை உரித்தாக்கிக் கொள்கிறேன். ஒன்று சேர்த்த நண்பர்கள் கல்யாண்  -கே.வி.ராஜா , மற்றும்
எழுத்துக்கூடம் - ரியாத் தமிழ் சங்கத்துக்கும் இந்த நிகழ்வுகளை தாயகத்திலிருந்தபடியே கண்காணித்து - அறிவுறுத்தி தம் கருத்துக்கள் மூலம் தட்டியும் குட்டியும் ஆர்வப்படுத்திக் கொண்டிருக்கும் ஐயா அப்பாஸ் இப்ராஹிம் அவர்களுக்கும் நன்றி கூறி இந்த பதிவை நிறைவு செய்கிறேன்.

அன்புடன் - அன்பிற்காக

லக்கி ஷாஜஹான்